Professor W A Landman se 80ste verjaarsdag Junie 2003 |
HULDIGINGSBOODSKAP: TO-GROEP Dr Hugh Davies Direkteur
Prof Willem Adolf Landman is 'n onderwysman in murg en been, en dit is vir die TO-Groep 'n
besondere voorreg om by die herdenking van sy 80ste verjaarsdag eer en hulde aan hom te bring.
Die besondere mens wat prof Landman is, het tot gevolg gehad dat ook die georganiseerde
onderwysprofessie in Suid-Afrika besondere seën en voorspoed uit sy kundigheid, sy wysheid
en sy uitmuntende vermoëns kon pluk, en dit is vir die TO-Groep vanaand nie net
'n vreugde nie, maar ook 'n besondere eer, om by hierdie baie spesiale tyd in prof Landman
se lewe ook die geleentheid te mag hê om hom te salueer.
Willem Landman se vroeë onderwysloopbaan het oor 'n tydperk van 15 jaar gestrek waartydens
hy aan die Transvaalse Onderwysdepartement verbonde was as assistent-onderwyser en vise-hoof,
asook as senior dosent aan die Pretoriase Onderwyskollege verantwoordelik vir die metodiek van
Natuurwetenskap en Toegepaste Wetenskap vir Huishoudkunde studente. Hy het in daardie tydperk
om ook as lid van die Transvaalse Onderwysersvereniging onderskei, en met groot trots kan ons
konstateer dat prof Landman se verbintenis met die TO reeds in 1947 'n aanvang geneem het.
Prof Landman het uitmuntende bydraes tot die werksaamhede van die georganiseerde
onderwysprofessie gelewer. Hy het 'n besondere belangstelling en betrokkenheid by
die onderwys gehad, en dit het daartoe gelei dat hy op verskillende terreine 'n aktiewe
aandeel in onderwyssake kon neem. Hy het by verskeie geleenthede in die strukture
van die TO gedien, en in 1976 het prof Landman as 'n verteenwoordiger van die
Universiteit van Pretoria tot die Hoofbestuur van die TO toegetree. In 1978 is hy as
stedelike verteenwoordiger tot die Uitvoerende Komitee verkies, waarna hy by verskeie
geleenthede ampte soos die van voorsitter van die Opvoedkundekomitee, voorsitter
van die Professionele Komitee, lid van die Dagbestuur, verteenwoordiger van die
professionele terrein van die TO in die Dagbestuur, asook Voorsitter van verskillende
ad hoc-komitees gedien het.
Prof Landman is in 1980 as verteenwoordiger van die TO in die Gesamentlike
Onderwysraad verkies, waar hy ook as voorsitter van die Raad se Komitee vir
Kwalifikasies en Opleiding, van die Navorsingskomitee, en ook as lid van die
Publikasiekomitee besondere belangrike bydraes gelewer het. Toe die Federale
Onderwysersraad in 1986 tot stand gekom het, het prof Landman as lid van die FOR
gedien, en was tot middel 1989 voorsitter van die Professionele Komitee. Hy het die
FOR in die Komitee van Onderwyshoofde se Advieskomitee oor Onderwysnavorsing
tot middel 1989 verteenwoordig. Hy het ook die FOR in die Raad vir
Geesteswetenskaplike Navorsing se Advieskomitee vir die Instituut vir Opvoedkundige
Navorsing gedien.
Toe prof Landman met die Erepenning van die TO by sy 79ste Algemene Vergadering
bekroon is, het die Oorkonde wat toe voorgehou is met die volgende woorde gesluit:
"Prof Landman het deur sy lewe en werk getoon dat hy 'n waardige houer van hierdie
toekenning sal wees, en dit is daarom vir die TO 'n besondere eer en voorreg om op
so 'n wyse hulde te bring aan 'n man wat sy lewe wy in diens van die opvoedkunde en
die onderwys". Prof Landman het daarna die waarheid van daardie voorspelling oor
en oor bewys. Gedurende die 17 jaar wat hy in die hoogste besture van die TO gedien
het, het hy 'n bykans onoorskoulike bydraende aandeel gehad in die voortgaan,
vestiging en bestendiging van die TO. Sy uitvoering van opdragte, hoe omvangryk
ookal, asook sy optredes as verteenwoordiger van die Vereniging en die
gesagsliggame van die georganiseerde onderwysprofessie in daardie jare, het altyd die
stempel gedra van deskundigheid, wetenskaplikheid, en bowenal lojaliteit aan die TO,
sy doelstellings en standpunte. Prof Landman het 'n leeftyd van onbaatsugtige diens
aan die onderwys en opvoeding van skoliere en studente gelewer, van wie baie deur
sy voorbeeld en inspirasie groot hoogtes bereik het, en nog steeds bereik.
In 1993 het prof Landman 'n monumentale werk van 12 volumes getiteld "Die
Transvaalse Onderwysersvereniging: Van Stryd tot Oorwinning 1893 to 1993" voltooi.
Enkele jare later het hy 'n tweede baie groot werk die lig laat sien toe hy die
geskiedenis van elke voorsitter en elke ondervoorsitter in die bestaan van die TO by
wyse van historiese navorsing, ontleding, en waardebepaling gedoen het. Dit is nie
oordrewe om te konstateer dat hy by uitstek die persoon is wat die geskiedenis van die
TO, en sy leiers oor 'n periode van meer as 100 jaar nagevors, geboekstaaf, en vir die
geslagte wat hierna sal volg, bewaar het nie.
Toe prof Landman agt jaar gelede in 1995 die tuig finaal neergelê het, is onder andere
by 'n spesiale geleentheid van hom gesê dat prof Landman monumente binne die
onderwys nalaat, en dat hierdie monumente altyd as herinnering aan hom sal dien.
Deur sy dekades lange verbintenis met die TO-Groep, is prof Landman getrou en lojaal
deur mev Rachel Landman ondersteun. Mev Landman - en toe hulle jonk en nog in die
huis was ook hulle kinders - het baie dikwels as gevolg van die feit dat hy bo en
behalwe al sy ander verpligtinge met die sake van die onderwysprofessie besig was,
prof Landman se aanwesigheid moes ontbeer; en sy en hulle kinders het help bou aan
dit waarmee hy besig was. Die TO-Groep het by geleentheid dank en waardering
teenoor mev Rachel Landman en die gesin uitgespreek, maar dit is 'n besondere
voorreg om dit weer by hierdie geleentheid te mag doen. Die waardering wat in die
TO-Groep vir mev Landman gekoester word, is iets wat nooit sal taan, of verdwyn nie.
Ons het die besondere voorreg om vanaand vir prof Landman te mag dankie sê vir
alles wat hy vir die georganiseerde professie oor 'n tydperk van amper 60 jaar beteken
het. Ons is dankbaar dat hierdie groot gees hom met die TO vereenselwig het, dat hy
aan die ideale van die TO help bou het, en dat hy 'n deel was van die groep persone
wat die TO daartoe in staat gestel het om die besondere hoë vlakke te bereik wat wél
bereik is. Sonder hom sou dit nie moontlik gewees het nie.
Die beste wense van die TO-Groep vergesel die egpaar Landman, met die bede dat
die keur van seëninge uit die hand van Hom wat alles uit genade skenk, steeds
vorentoe hulle porsie sal wees, en dat die Here al hulle weë gelyk sal maak.
|